श्रावण महिन्यातील महत्त्वाचा सण नागपंचमी शिवतेज नगर, चिंचवड येथील घरकुल चौकाजवळील श्री स्वामी समर्थ मंदिर परिसरात उत्साहात साजरी करण्यात आली. श्री स्वामी समर्थ प्रतिष्ठान आणि ज्येष्ठ माजी नगरसेवक नारायण बहिरवाडे यांच्या मार्गदर्शनाखाली महिलांसाठी विशेष कार्यक्रमाचे आयोजन करण्यात आले होते.
यावेळी शेकडो महिलांनी नाग प्रतिमेचे पूजन करून पारंपरिक पद्धतीने नागपंचमी साजरी केली. महिलांनी झिम्मा, फुगडी, फेर आणि नृत्य सादर करत उत्साहात सहभाग घेतला. तसेच झोक्यावर झुलण्याचा आनंद घेत महिलांनी पारंपरिक सणाच्या आठवणींना उजाळा दिला. ज्येष्ठ महिलांनी पारंपरिक गाणी सादर करून कार्यक्रमाची रंगत वाढवली. यावेळी नगरसेविका योगिता नागरगोजे यांनी महिलांना नागपंचमीच्या शुभेच्छा देताना, या आयोजनामुळे प्रत्येक महिलेला माहेरी आल्यासारखी आपुलकीची भावना निर्माण होत असल्याचे सांगितले.
नागपंचमीच्या पूजेसाठी नागाची प्रतिमा तसेच कृत्रिम वारूळ तयार करण्यात आले होते. नागांना दूध व इतर पदार्थ अर्पण केल्याने त्यांची हानी होऊ नये, यासाठी पर्यावरणपूरक पद्धतीने हा उपक्रम राबविण्यात आला. नागपंचमी हा महिलांसाठी जिव्हाळ्याचा आणि निसर्गातील प्रत्येक जीवाबद्दल आदर व्यक्त करणारा सण असल्याचे अंजली देव यांनी सांगितले.
या सणामागील पौराणिक महत्त्व सांगताना छाया महाजन यांनी श्रीकृष्णाने कालिया नागाचे मर्दन केल्याच्या कथेला उजाळा दिला.
कार्यक्रमाला नारायणराव बहिरवाडे, स्नेहा गुणवंत, क्षमा काळे, गीता पाटील, विद्या दुदुसकर, नीलिमा भंगाळे, स्मिता शिरसाट, अश्विनी केवाडकर, रेश्मा माधव, हरि नारायण शेळके, राजीव गुणवंत, दीपक बिरादार, चैतन्य बनकर, मेघराज बागी, रोहन नंदनवाड आदी उपस्थित होते.
