म्हापसा, गोवा येथील स्पोर्ट्स कॉम्प्लेक्समध्ये २ ते ४ ऑक्टोबरदरम्यान झालेल्या राष्ट्रीय थाई किक बॉक्सिंग चॅम्पियनशिप व टायटल बेल्ट स्पर्धेत आर्यन्स मार्शल आर्टच्या खेळाडूंनी उल्लेखनीय कामगिरी केली. या स्पर्धेचे आयोजन इंडिया थाई किक बॉक्सिंग फेडरेशनने केले होते.
महिलांच्या ६५ किलोवरील गटात शरयू संतोष म्हात्रे हिने, तर ५५ किलोखालील गटात सायली घोडके हिने प्रतिस्पर्ध्यांवर मात करत टायटल बेल्ट पटकावला. संजीवनी पटटायत हिने ४५ किलोखालील, आराध्या कर्पे हिने ३० किलोखालील आणि आदित्य आडगळे याने ७५ किलोखालील वजन गटात सुवर्णपदक मिळवले. अमित लोहार याने ५५ किलोखालील गटात रौप्य, तर समीर लोहार याने ६५ किलो गटात कांस्यपदक पटकावले.
या यशामागे आर्यन्स मार्शल आर्टचे संस्थापक व प्रमुख प्रशिक्षक संतोष म्हात्रे यांचे मार्गदर्शन लाभले. खेळाडूंच्या या कामगिरीचे क्रीडा क्षेत्रातून कौतुक होत आहे.
