भोसरी येथील कौटुंबिक मिळकतीच्या विकास व्यवहारात आर्थिक फसवणूक, विश्वासघात तसेच जीवे मारण्याची धमकी दिल्याचा आरोप करत विनोद अनंता धुमाळ यांनी विशाल चोरडिया कन्स्ट्रक्शन प्रा. लि.चे संचालक कुणाल दिलीप चोरडिया यांच्याविरोधात तातडीने फौजदारी गुन्हा दाखल करून कठोर कारवाई करण्याची मागणी केली आहे. पिंपरी येथील नमस्कार हॉटेलमध्ये सोमवारी (दि. ३) आयोजित पत्रकार परिषदेत धुमाळ यांनी या प्रकरणाची माहिती दिली.
धुमाळ यांच्या म्हणण्यानुसार, दिलीप मोतीलाल चोरडिया, कुणाल दिलीप चोरडिया आणि मध्यस्थ प्रफुल्ल इनामदार यांच्यासोबत मिळकतीच्या विकासाबाबत चर्चा झाली होती. त्यानंतर २२ डिसेंबर २००६ रोजी कुलमुखत्यारपत्र आणि विकसन करारनामा दुय्यम निबंधक कार्यालय, हवेली क्र. १७ येथे नोंदविण्यात आला. या करारानुसार मिळकतीच्या विकासाच्या मोबदल्यात व्यावसायिक बांधकामाच्या तळमजल्यावर एक दुकान आणि ६५० चौरस फुटांचा सुपर बिल्टअप फ्लॅट चार वर्षांत देण्याचे मान्य करण्यात आल्याचा दावा धुमाळ यांनी केला.
मात्र, कराराला जवळपास २० वर्षे उलटूनही विकासकाम सुरू झाले नसून ठरलेला मोबदलाही मिळाला नसल्याचा आरोप त्यांनी केला. याबाबत वारंवार पाठपुरावा करूनही केवळ आश्वासने देण्यात आली. अखेर मोबदला अथवा मिळकत परत देण्याची मागणी केल्यानंतर कुणाल चोरडिया आणि प्रफुल्ल इनामदार यांनी आपल्याला धमकावल्याचा आरोप धुमाळ यांनी पत्रकार परिषदेत केला.
आपल्याला खोट्या गुन्ह्यात अडकविण्याची तसेच जीवे मारून गायब करण्याची धमकी देण्यात आली आणि शिवीगाळ करून शर्टाची कॉलर पकडण्यात आल्याचाही गंभीर आरोप धुमाळ यांनी केला. यासंदर्भात दापोडी पोलीस ठाण्यात लेखी तक्रार दिली असून व्यवहाराशी संबंधित कागदपत्रे व इतर पुरावे पोलिसांकडे सादर केल्याचे त्यांनी सांगितले.
“माझी कोणाशीही वैयक्तिक वैरभावना नाही. माझ्या कुटुंबाची फसवणूक झाली असून आम्हाला न्याय मिळावा, एवढीच अपेक्षा आहे,” असे धुमाळ म्हणाले. पोलिसांनी निष्पक्ष चौकशी करून संबंधितांवर तातडीने गुन्हा दाखल करावा; अन्यथा वरिष्ठ पोलीस अधिकारी, जिल्हाधिकारी आणि राज्य शासनाकडे दाद मागून लोकशाही मार्गाने आंदोलन करण्यात येईल, असा इशाराही त्यांनी दिला.
दरम्यान, या आरोपांबाबत कुणाल चोरडिया अथवा संबंधितांची बाजू उपलब्ध होऊ शकलेली नाही. त्यांची बाजू समोर आल्यानंतर तीही प्रसिद्ध करण्यात येईल.
