महापालिका निवडणुकांसाठी उमेदवारी अर्जांची छाननी प्रक्रिया आजपासून सुरू झाली असून, अनेक ठिकाणी आक्षेपांमुळे उमेदवारांचे अर्ज बाद होत असल्याचं चित्र आहे. मुंबईनंतर आता पिंपरी चिंचवडमध्येही भाजप आणि शिंदे गटाच्या शिवसेनेला मोठा धक्का बसला आहे.
पिंपरी चिंचवड महापालिकेतील प्रभाग क्रमांक 24 मध्ये भाजपच्या तीन तर शिंदे गटाच्या शिवसेनेच्या दोन उमेदवारांचे एबी (AB) फॉर्म छाननीदरम्यान बाद ठरविण्यात आले आहेत. अर्ज भरण्याची अंतिम मुदत संपल्यानंतर हे एबी फॉर्म सादर करण्यात आल्याने विरोधी उमेदवारांनी त्यावर आक्षेप घेतला होता. त्या आक्षेपांवर आजच्या छाननीत निर्णय देण्यात आला.
या प्रभागात शिवसेना खासदार श्रीरंग बारणे यांचा प्रभाव असतानाही युतीतील दोन्ही पक्षांना हा मोठा फटका बसला आहे. आता या पाचही उमेदवारांना अपक्ष म्हणून निवडणूक लढवावी लागणार आहे. परिणामी, भाजप आणि शिंदे गटाला स्वतंत्र प्रचार यंत्रणा उभारावी लागणार असून स्थानिक पातळीवर मोठी अडचण निर्माण झाली आहे.
दरम्यान, मुंबईतही भाजपला फटका बसला आहे. वॉर्ड क्रमांक 211 मध्ये कागदपत्रांची पूर्तता न झाल्याने भाजप उमेदवाराचा अर्ज स्वीकारण्यात आलेला नाही. तर वॉर्ड क्रमांक 212 मध्ये उमेदवार 15 मिनिटे उशिरा पोहोचल्याने अर्ज नामंजूर करण्यात आला. त्यामुळे या दोन वॉर्डांमध्ये भाजपचा उमेदवारच नसल्याची चर्चा सुरू आहे.
याचवेळी मुंबई महापालिकेत ठाकरे गटाच्या शिवसेनेच्या पाच उमेदवारांच्या अर्जांवर शिंदे गटाने आक्षेप घेतला आहे. मालाड पूर्वेतील प्रभाग क्रमांक 38 ते 42 मधील उमेदवारांच्या एबी फॉर्मवर डिजिटल स्वाक्षरी असल्याने उमेदवारी धोक्यात आली आहे. निवडणूक कार्यालयात सुरू असलेल्या छाननी प्रक्रियेमुळे ठाकरे गटाची चिंता वाढली आहे.
हेही वाचा…
राष्ट्रवादीकडून प्रभाग क्र. ७ मध्ये विराज लांडे मैदानात, उमेदवारी अर्ज दाखल
