पिंपरी-चिंचवड महानगरपालिका निवडणूक आता निर्णायक टप्प्यावर येऊन ठेपली असून सर्वच प्रभागांमध्ये प्रचाराला वेग आला आहे. या पार्श्वभूमीवर प्रभाग क्रमांक २० सध्या राजकीय वर्तुळात मोठ्या चर्चेचा विषय ठरत आहे. या प्रभागात १२ जानेवारी रोजी भाजप उमेदवारांच्या प्रचारासाठी भव्य सभेचे आयोजन करण्यात आले होते. या सभेमुळे परिसरातील राजकीय वातावरण तापल्याचे चित्र दिसून आले.
या प्रचारसभेसाठी राज्याचे सार्वजनिक बांधकाम मंत्री शिवेंद्रराजे भोसले यांनी प्रमुख उपस्थिती लावली. त्यांच्या उपस्थितीमुळे कार्यकर्त्यांमध्ये उत्साह संचारला असून नागरिकांनीही सभेला मोठ्या संख्येने हजेरी लावली. भाजपचे पदाधिकारी, कार्यकर्ते आणि स्थानिक नागरिकांनी सभा स्थळी मोठी गर्दी केली होती.
यावेळी उपस्थितांना संबोधित करताना शिवेंद्रराजे भोसले यांनी भाजपच्या विकासकामांचा आढावा घेतला. त्यांनी केंद्र आणि राज्य सरकारच्या माध्यमातून राबविण्यात आलेल्या विविध विकास योजना, पायाभूत सुविधा, रस्ते, जलसंपदा आणि नागरी सुविधा यांचा उल्लेख केला. प्रभाग क्रमांक २० चा सर्वांगीण विकास करण्यासाठी भाजपचे उमेदवार सक्षम आणि अनुभवी असल्याचे त्यांनी सांगितले.
या सभेत शिवेंद्रराजे भोसले यांनी भाजप उमेदवार सुजाता पालांडे, संदीप बागडे, रश्मी लांडे आणि सतीश नागरगोजे यांना भरभरून मतदान करण्याचे आवाहन नागरिकांना केले. “हे चारही उमेदवार प्रभागाच्या विकासासाठी प्रामाणिकपणे काम करतील. नागरिकांच्या प्रश्नांना प्राधान्य देऊन प्रभागाला विकासाच्या मार्गावर नेतील,” असा विश्वास त्यांनी व्यक्त केला.
दरम्यान, येत्या १५ जानेवारी रोजी मतदान होणार असून १६ जानेवारीला मतमोजणी व निकाल जाहीर होणार आहे. त्यामुळे प्रचाराचा शेवटचा टप्पा अधिकच महत्त्वाचा ठरत आहे. प्रभाग क्रमांक २० मध्ये कोण बाजी मारणार, याकडे आता सर्वांचे लक्ष लागले असून निवडणूक निकालाची उत्सुकता शिगेला पोहोचली आहे.
हेही वाचा…
पिंपरी-चिंचवड प्रभाग 08 मध्ये शिवसेना शिंदे गटाचे जोरदार शक्तीप्रदर्शन!
पिंपरी-चिंचवड महापालिका निवडणूक निर्णायक टप्प्यावर
