पुण्यात भाजपसह अन्य पक्षांना धक्का!

पुणे महापालिका निवडणुकीसाठी उमेदवारी अर्ज भरण्याची अंतिम मुदत एका दिवसावर येऊन ठेपली असून, या पार्श्वभूमीवर शहराच्या राजकारणात मोठ्या घडामोडींना वेग आला आहे. सर्वच प्रमुख पक्षांकडून उमेदवार निश्चितीची प्रक्रिया अंतिम टप्प्यात असताना, तिकीट नाकारण्यात आलेल्या इच्छुकांमध्ये तीव्र अस्वस्थता दिसून येत आहे. विशेषतः भाजपसह इतर पक्षांमधील नाराज नेत्यांनी आता राष्ट्रवादी काँग्रेस (अजित पवार) गटाचा रस्ता स्वीकारल्याने राजकीय समीकरणे बदलताना दिसत आहेत.

भाजपकडून उमेदवारी न मिळालेल्या अनेक माजी नगरसेवक व इच्छुकांनी ‘घड्याळ’ या चिन्हाची साथ स्वीकारली आहे. भाजपच्या माजी नगरसेविका सुनिता गंलाडे, भाजपचे माजी नगरसेवक शंकर पवार, धनंजय जाधव, संदीप जाधव यांच्यासह राष्ट्रवादी काँग्रेस (शरद पवार) पक्षाचे अ‍ॅड. निलेश निकम, काँग्रेसचे माजी नगरसेवक दत्ता बहिरट आणि मनसेचे नेते जयराज लांडगे यांनी राष्ट्रवादी काँग्रेस (अजित पवार) गटात अधिकृत प्रवेश केला आहे. या सामूहिक प्रवेशामुळे राजकीय वर्तुळात चर्चांना उधाण आले आहे.

पुणे महापालिका निवडणुकीसाठी भाजपमध्ये इच्छुकांची संख्या मोठ्या प्रमाणात असल्याने पक्षाने उमेदवारी निश्चितीची प्रक्रिया जलदगतीने राबवली. अनेक उमेदवारांना थेट फोनद्वारे उमेदवारीची माहिती देत एबी फॉर्मही पोहोचवण्यात आले. मात्र, यामुळे तिकीट न मिळालेल्या इच्छुकांमध्ये नाराजीचे वातावरण निर्माण झाले. या नाराजीचा थेट फायदा राष्ट्रवादी काँग्रेस (अजित पवार) गटाला होताना दिसत आहे.

दरम्यान, राष्ट्रवादी काँग्रेस (अजित पवार) आणि राष्ट्रवादी काँग्रेस (शरद पवार) या दोन्ही गटांमध्ये आघाडी झाल्याने त्यांच्या राजकीय ताकदीत लक्षणीय वाढ झाली आहे. स्थानिक पातळीवर अनुभवी माजी नगरसेवक, विविध पक्षांतील नेते आणि कार्यकर्त्यांचा पाठिंबा मिळाल्यामुळे राष्ट्रवादी काँग्रेस अधिक बळकट होत असल्याचे चित्र आहे.

या घडामोडींमुळे पुणे महापालिका निवडणूक अत्यंत चुरशीची होण्याची चिन्हे आहेत. येत्या काही दिवसांत आणखी कोण कोणते राजकीय निर्णय घेतात, याकडे संपूर्ण शहराचे लक्ष लागून राहिले आहे.